- २५ भाद्र २०८३, बिहीबार / Sep 10, 2026
काठमाडौं । विवादमा तानिएकी कलाकार तथा निर्देशक दीपाश्री निरौलाले आफूले गल्ती गरेको भन्दै माफी मागेकी छन् । घटनाबाट धेरै ठूलो पाठ सिकेको भन्दै माफी मागेकी हुन् । केही महिनाअघि एक अन्तर्वार्ताका क्रममा दीपाश्रीले ‘राजेश हमाल महानायक हुनुहुन्छ र रु’ भन्दै अभिव्यक्ति दिएकी थिइन् ।
उनको यो अभिव्यक्तिपछि सामाजिक सञ्जालमा दीपाश्रीको व्यापक आलोचना भएको थियो । सामाजिक सञ्जालमा उनी ट्रोलको शिकार बनेकी थिइन् । र, कतिपय प्रयोगकर्ताले त उनलाई तल्लो स्तरका शब्द प्रयोग गरेर गालीसमेत गरेका थिए । हमालका फ्यानले दीपाश्री निरौलाले हमाललाई ‘महानायक’ नभनेको भन्दै आलोचना गरेका थिए ।
सामाजिक सञ्जालमा सक्रिय हुने दीपाश्री यो घटनापछि भने निष्क्रिय थिइन् । आइतवार दीपाश्रीले आफ्नो जन्मदिनका अवसरमा सामाजिक सञ्जाल फेसबूकमा एक भिडियो सार्वजनिक गर्दै यो घटनाले ठूलो पाठ सिकाएको र थप सचेत बनाएको बताएकी छिन् । उनले जीवनको आधा समय ‘पीडादायी’ रहे पनि वि.सं. २०६० सालदेखि प्रदर्शनमा आएको हास्य टेलिश्रृङ्खला ‘तीतो सत्य’ पछि भने पछाडि फर्केर हेर्नु नपरेको बताइन् ।
यो श्रङ्खला ६ सय भागसम्म सफलताका साथ प्रदर्शन भएको थियो । कला क्षेत्रमा सफल भए पनि व्यक्तित्व विकासमा भने कमजोरी रहेको बुझेको बताइन् । ‘व्यक्तित्व विकासका कुराहरुमा मेरो अझै कमजोरी रहेछ,’ उनले स्वीकारिन् ।
