- २२ भाद्र २०८३, सोमबार / Sep 7, 2026
काठमाण्डौ । कोरोना भाइरस (कोभिड १९) को महामारीबाट सबैभन्दा बढी प्रभावित भएका मानिसलाई ‘राइस एटीएम’बाट भियतनामभरि चामल वितरण गर्ने व्यवस्था मिलाएको छ । अहिलेसम्म दुई सय ६५ जनामा कोरोना सङ्क्रमण देखिएको भियतनाममा कसैको पनि ज्यान गएको छैन ।
कोरोनाको सङ्क्रमण बढ्न नदिन सरकारले व्यक्ति–व्यक्तिबीचको दुरीलाई कडाइपूर्वक कार्यान्वयनमा ल्याएको छ । साना पसल र व्यवसाय बन्द गरिएको छ भने हजारौँले काम छोडेका छन् । कोरोनाको कारण कामविहीन भएकाहरुका लागि विभिन्न व्यापारी र दाताहरुले शहरको कैयौँ ठाउँमा एटीएमबाट सित्तैमा चामल वितरण गरिरहेका छन् ।
हनोईमा प्रत्येक दिन बिहान पानी बोक्ने ट्याङ्करले चामल ल्याउने र बिहान ८ बजेदेखि साँझ ५ बजेसम्म वितरण गरिने समाचार एजेन्सी भीएनएले जनाएको छ । ‘एटीएमबाट चामल लिन लाइनमा लागेकाहरुले एकअर्कामा ६ फिटको दुरी कायम गरिएको छ । चामल थैलामा भर्नुअघि अनिवार्य रुपमा स्यानिटाइजरको प्रयोग गरिने व्यवस्था मिलाइएको छ ।
हो ची मिन्हमा रहेको राइस एटीएम हप्ताको सातै दिन चौबिसै घण्टा सञ्चालनमा ल्याइएको समाचार एजेन्सीले जनाएको छ ।
