- ३१ असार २०८३, बुधबार / Jul 15, 2026
सुर्खेत । तालिमका लागि काठमाडौंमा रहेका भेरीगंगा नगरपालिका सुर्खेतका प्रमुख प्रशासकीय अधिकृत कमल पौडेल पक्राउ परेका छन् । पौडेललाई अख्तियार दुरुपयोग अनुसन्धान आयोगले पक्राउ गरेको हो । भेरीगंगा नगरपालिकाका खानेपानी प्राविधिक चन्द्रबहादुर केसीलाई दुईलाख घुस सहित अख्तियारको टोलीले फागुन ८ गते पक्राउ गरेको थियो।
केसीको साथमा भएको मोबाइलको कल रेकर्डको आधारमा पौडेल पनि छानबिनको दायरामा आएको अख्तियारले जनाएको छ । प्राविधिक केसीले नगरपालिकाको वडा नम्बर ११, तल्लो बराहस्थित झोलुङ्गे पुल निर्माणको भुक्तानीमा सहजीकरण गरिदिने भन्दै सेवाग्राहीसँग घुस मागेका थिए।
हिरासतमा रहेका पौडेलको अनुसन्धान भइरहेकाले अन्य कुरा भन्न नमिल्ले अख्तियारले जनाएको छ । प्रमुख प्रशासकीय अधिकृत कमल पौडेल काठमाडौंबाट नै पक्राउ परेकोले आधिकारिक रुपमा सुर्खेतलाई थाहा नभएको आयोग सुर्खेतका सूचना अधिकारी मेघनाथ सापकोटाले बताए ।
भेरीगंगा नगरपालिकाका कर्मचारीले भने, हाकिम साप एघार गते नै हिड्नु भएको हो। अलि तनावमा हुनुहुन्थ्यो।‘ अतिआवश्यक चेकमा सहि नगरी काठमाडौं गएका हुन । काठमाडौं पुग्दा मोबाइल स्विचअफ थियो। पछि बुझ्दै जाँदा थाहा भयो अख्तियारको हिरासतमा रहेछन्।’
