- २३ श्रावण २०८३, शनिबार / Aug 8, 2026
१७ साउन २०७७ विराटनगर । श्रम कार्यालय विराटनगरका प्रमुख प्रेम सञ्जेल आफ्नै कार्यालयका कार्यालय सहयोगी कर्मचारीद्धारा कार्यकक्षमै कुटिएका छन् । हरेक शनिबार कार्यालय जाने सञ्जेल आज शनिबार पनि केही ढिलागरी कार्यालय पुगेका थिए ।
कार्यालयमा पुगेपछि कार्यालय सहियोगी नेत्र भट्टराई निरौला र मेनुका सापकोटा कोइरालाले उनलाई कुटपिट गरेको प्रहरीले जनाएको छ । सञ्जेलले यौन दुव्र्यवहार गरेको, अनावश्यक काममा पेलाएको, जिम्मामै नभएको वस्तुको सुरक्षामाथि प्रश्न उठाएर दुःख दिएको महिलाले आरोप लगाएकी छन् ।
महिला कर्मचारीहरुले कार्यालय प्रमुखको टेवलमा रहेको टेवल वेटले सञ्जेलमाथि प्रहार गरेका थिए । हात र मुक्काले पिटेका कारण प्रमुख सञ्जेलको ओठ काटिएको छ भने टाउकोको विभिन्न भागमा चोट लागेको छ । घटनापछि प्रहरीले तीनै जनालाई जिल्ला प्रहरी कार्यालयमा लगेको छ ।
यता सञ्जेलले भने आफुलाई कार्यकक्षको ढोका थुनेर नियोजित आक्रमण गरी ज्यान मार्न खोजेको भन्दै ज्यान मार्ने उद्योगको जाहेरी दर्ता गराउने प्रयास गरेका छन् । सञ्जेल भ्रष्टाचार विरोधी अभियानको अभियान्ताको रुपमा परिचित छन् ।
