सिंहदरबार प्रवेशमा रोक

२१ साउन २०७७ काठमाडौं । महामारीको रुपमा फैलिएको कोरोना भाइरसको सङ्क्रमण बढ्दै गएपछि मुलुकको प्रमुख प्रशासनिक केन्द्र सिंहदरबार प्रवेशमा रोक लगाइएको छ ।

अत्यावश्यक कामबाहेकका व्यक्तिलाई प्रवेशमा कडाइ गरिएको गृहमन्त्रालयले जनाएको छ ।मन्त्रालयका प्रवक्ता चक्रबहादुर बुढाले अत्यावश्यक कामका लागि सुरक्षा मापदण्ड अपनाएर प्रवेशमा समस्या नभएको तर भेटघाट र गफगाफका लागि प्रवेशमा रोक लगाइएको बताए ।

जोखिम नबढोस् भनेर ध्यान दिनुपर्ने भएकाले अत्यावश्यक कामबाहेकका लागि उक्त व्यवस्था लागू गरिएको उनको भनाइ छ । भित्रबाट पास पठाएर प्रवेश अनुमति दिने कार्यमा पनि तत्कालका लागि रोक लगाइएको छ । अहिलेको जटिल परिस्थितिमा नागरिक आफैँले पनि सुरक्षा सावधानी अपनाउन र अत्यावश्यक काम नपरी बाहिर ननिस्किन तथा सिंहदरबार नआउनसमेत अनुरोध गरिएको छ ।

प्रेस पास भएका पत्रकारलाई कुनै रोक नलगाइएको उनले प्रष्ट पारे । पछिल्लो समयमा काठमाडौँ उपत्यकामा कोभिड–१९ को सङ्क्रमण बढिरहेको छ ।