- २६ भाद्र २०८३, शुक्रबार / Sep 11, 2026
काठमाडौं, २६ भदौ । कंगोको विद्रोहीको कब्जामा रहेको बुकावु सहरका दुई विद्यालयमा आगलागी हुँदा भएको भागदौडमा कम्तीमा २९ विद्यार्थीको मृत्यु भएको छ ।
बुकावुको घना बस्ती रहेको कदूतु क्षेत्रमा विद्यालयमा आगलागी भएपछि विद्यार्थी तथा स्थानीयमा भागदौड मच्चिएको थियो । घटनामा केही वयस्कको समेत मृत्यु भएको बताइएको छ ।
आगलागीमा घाइते भएका तथा सुरक्षित उद्धार गरिएका व्यक्तिलाई उपचारका लागि नजिकैका अस्पतालमा लगिएको छ । घटनास्थलबाट सार्वजनिक भएका दृश्यमा केही बालबालिका अस्पतालको भुइँमा उपचारको पर्खाइमा रहेको देखिएको जनाइएको छ ।
आगलागीका कारण आसपासका करिब ३ सय घरसमेत जलेर नष्ट भएका छन् । ठूलो क्षेत्र प्रभावित भएकाले मृतकको संख्या अझै बढ्न सक्ने स्थानीय अधिकारीहरूले आशंका गरेका छन् ।
विद्यालयमा आगलागी कसरी सुरु भयो भन्ने विषयमा भने अहिलेसम्म स्पष्ट जानकारी प्राप्त भएको छैन । घटनाको कारणबारे अनुसन्धान भइरहेको जनाइएको छ ।
बुकावु क्षेत्रमा पछिल्लो समय सुरक्षा अवस्था चुनौतीपूर्ण रहँदै आएको छ । विद्रोहीको प्रभाव रहेको क्षेत्रमा भएको यो घटनाले स्थानीय बासिन्दामा थप त्रास उत्पन्न गरेको छ ।
