- ४ जेष्ठ २०८३, सोमबार / May 18, 2026
एजेन्सी । इस्लामावादमा अमेरिका र इरानबीच भएको उच्चस्तरीय शान्ति वार्ता कुनै ठोस सहमति बिना नै टुंगिएको छ । करिब २१ घण्टा लामो छलफलपछि दुवै पक्ष आ–आफ्नो अडानमा अडिग रहेपछि वार्ता निष्कर्षविहीन बनेको हो ।
अमेरिकी उपराष्ट्रपति जेडी भान्सले सञ्चारकर्मीहरूसँग कुरा गर्दै अमेरिका लचिलो बन्ने प्रयास गरे पनि इरानले प्रस्ताव स्वीकार नगरेको बताए । उनका अनुसार अमेरिकाले ‘अन्तिम र उत्कृष्ट प्रस्ताव’ प्रस्तुत गरिसकेको छ र अब निर्णय इरानकै हातमा रहेको छ ।
त्यसैगरी अमेरिकी टोलीमा जारेड कुश्नर र स्टिभ विट्क पनि सहभागी थिए । वार्तामा इरानको आणविक कार्यक्रम पूर्ण रूपमा रोक्ने विषय अमेरिकाको मुख्य प्राथमिकता रहेको जनाइएको छ ।
यता, इरानले भने अमेरिकामाथि अत्यधिक र गैरकानुनी माग राखेको आरोप लगाएको छ । इरानी विदेश मन्त्रालयले आफ्नो वैध अधिकारको सम्मान नभएसम्म कुनै सम्झौता सम्भव नभएको स्पष्ट पारेको छ ।
यस वार्तामा मध्यस्थकर्ता बनेको पाकिस्तानको भूमिकाको अमेरिकाले प्रशंसा गरेको छ । तर वार्ता असफल भएपछि मध्यपूर्व क्षेत्रमा तनाव अझ बढ्ने संकेत देखिएको छ ।
