- २२ भाद्र २०८३, सोमबार / Sep 7, 2026
काठमाण्डौ, ३ बैशाख । अमेरिका र इरान बीच पछिल्लो समय असफल बनेको वार्तापछि फेरि संवाद शुरू हुन सक्ने संकेत देखिएको छ। असीम मुनीर नेतृत्वको पाकिस्तानी उच्चस्तरीय प्रतिनिधिमण्डल तेहरान पुगेको बीबीसी ले जनाएको छ। उक्त टोलीमा मोहसिन नक्वी पनि सहभागी हुनुहुन्छ।
इरान सरकारको आधिकारिक स्रोतले उक्त भ्रमणका तस्बिर सार्वजनिक गरेको छ। यो भ्रमणलाई अमेरिका–इरानबीच पुनः वार्ता गराउने प्रयासका रूपमा हेरिएको छ। यसअघि वार्ता निष्कर्षविहीन बनेपछि अहिले दुवै देशबीच पाकिस्तानी मध्यस्थतामार्फत सन्देश आदान–प्रदान भइरहेको इरानको भनाइ छ। डोनाल्ड ट्रम्प ले पनि हालैको अन्तर्वार्तामा इरानसँग फेरि वार्ता हुन सक्ने बताउनुभएको थियो।
उहाँले युद्ध अन्त्य नजिक पुगेको दाबी गरे पनि आवश्यक परे थप कारबाही हुन सक्ने संकेत पनि दिनुभएको अन्तर्राष्ट्रिय सञ्चारमाध्यमहरूले जनाएका छन्। हर्मुज जलमार्ग मा जहाज आवतजावतको विषय अझै अन्योलपूर्ण रहेको बताइएको छ।
पाकिस्तानको सक्रिय कूटनीतिक पहलबीच अमेरिका–इरान सम्बन्ध पुनः संवादतर्फ उन्मुख हुने संकेत देखिए पनि क्षेत्रीय तनाव भने अझै कायमै रहेको अन्तर्राष्ट्रिय सञ्चारमाध्यमहरूले उल्लेख गरेका छन्। दुई देशबीचको दुई हप्ते युद्धविरामको समय आउँदो हप्तासम्म कायम रहने जनाइएको छ।
