- ७ श्रावण २०८३, बिहीबार / Jul 23, 2026
काठमाडौं, ७ साउन । अमेरिकी राष्ट्रपति डोनाल्ड ट्रम्पले स्ट्रेट अफ होर्मुजमा जहाजहरूमाथि हुने आक्रमण नरोकिए इरानका महत्त्वपूर्ण भौतिक पूर्वाधारहरू ध्वस्त पार्ने चेतावनी दिएका छन् ।
ट्रम्पले इरानी सेनाले कुनै पनि जहाजमाथि मिसाइल, रकेट वा ड्रोनमार्फत आक्रमण गरे त्यसको जवाफस्वरूप इरानका पुल, पावर प्लान्ट तथा अन्य रणनीतिक संरचनामाथि सैन्य कारबाही गरिने बताएका हुन् ।
सामाजिक सञ्जाल ट्रुथ सोसल मार्फत उनले सम्भावित लक्ष्यहरूमा राजधानी तेहरान तथा वरपरका महत्त्वपूर्ण पूर्वाधारसमेत पर्न सक्ने उल्लेख गरेका छन् ।
पछिल्ला ११ दिनदेखि अमेरिका र इरानबीच तनाव बढ्दै गएको छ । इरानी सञ्चारमाध्यमका अनुसार तेहरान, ताब्रिज र बुशेहरलगायत विभिन्न क्षेत्रमा विस्फोटका आवाज सुनिएका छन् । बुशेहरमा इरानको एकमात्र सञ्चालनमा रहेको आणविक विद्युत् केन्द्र रहेको छ ।
ट्रम्पले इरानको भूमिगत ‘पिक्याक्स माउन्टेन’ आणविक केन्द्र लाई पनि सम्भावित लक्ष्य बनाउन सकिने सङ्केत दिएका छन् ।
यता, इरानका शीर्ष वार्ताकार मोहम्मद बागेर घालिबाफले अमेरिकालाई कडा चेतावनी दिँदै इरानको सुरक्षा सुनिश्चित नभए क्षेत्रका कुनै पनि पूर्वाधार सुरक्षित नरहने बताएका छन् । उनले इरानले तेल निर्यात गर्न नपाए अरू देशले पनि सहज रूपमा तेल निर्यात गर्न नसक्ने चेतावनी दिएका छन् ।
बढ्दो तनावका कारण अन्तर्राष्ट्रिय बजारमा कच्चा तेलको मूल्य उकालो लागेको छ । हाल कच्चा तेलको मूल्य बढेर प्रति ब्यारेल ९४ अमेरिकी डलर पुगेको बताइएको छ ।
