हावा गफ हो कि यथार्थ मन्त्री ज्यू ?

काठमाडौं । स्वास्थ्य तथा जनसङ्ख्यामन्त्री भानुभक्त ढकालले नागरिक अब उपचार नपाएर मर्नु नपर्ने बताएका छन् । उपचार विना मृत्युवरण गर्न नपर्ने वातावरण सरकारले सिर्जना गर्ने उनको दावी छ । स्वास्थ्य तथा जनसङ्ख्या मन्त्रालयको कार्यभार सम्हालेपछिको पहिलो औपचारिक कार्यक्रममा सम्बोधन गर्दै मन्त्री ढकालले स्वस्थ्य नागरिक भएमात्र समृद्ध नेपाल बन्छ भन्ने तर्क सारे।

‘अब पैसा नभएका कारण उपचार हुनबाट नागरिक वञ्चित हुनु पर्दैन । राज्यले नागरिकको उपचारको जिम्मा लिन्छ । ‘उपचार गर्न राज्य छ’ भन्ने अनुभूति नागरिकलाई दिन्छु, मेरो पहिलो ध्यान यसैमा रहन्छ ।’ उनले भने, ‘म समग्र मन्त्रालयका बारेमा ब्रिफिङ लिँदैछु । यो सकिएपछि केही नयाँ कामको शुरुआत गर्छु । नीति तथा कार्यक्रम र बजेटमा भएका कार्यक्रमलाई प्रभावकारी कार्यान्वयनमा लान मेरो जोड रहन्छ ।’

बालस्वास्थ्य तथा खोप सेवा शाखाद्वारा आयोजित दादुरा रुवेला खोप अभियान सञ्चालन तथा नियमित खोप सुदृढीकरण पूर्वतयारी बैठकमा उनले स्वास्थ्य क्षेत्रमा विधि र थिति बसाली सम्मानित र व्यवस्थित बनाउने प्रतिबद्धता जनाए ।
मन्त्रीको यो भनाई हावा गफ मात्र हो कि यथार्थ हो भन्नेमा व्यापक जनचाँसो छ । यसभन्दा पहिले मन्त्रीले पनि धेरै बोलेको तर सिन्को समेत नभाँचेको एक कर्मचारीले बताए ।