- २५ भाद्र २०८३, बिहीबार / Sep 10, 2026
काठमाडौं, २५ भदौ । फिलिपिन्समा यात्रुवाहक डुंगामा आगलागी हुँदा पाँच जनाको मृत्यु भएको छ भने ८७ जना बेपत्ता भएका छन् । फिलिपिन्सको पालावान प्रान्तअन्तर्गत कोरोन क्षेत्रनजिक समुद्रमा रहेको एमभी जुन एस्टर नामक डुंगामा आगलागी भएको हो ।
फिलिपिन्स कोस्ट गार्डका अनुसार दुर्घटनापछि ४२ जनाको सकुशल उद्धार गरिएको छ । कोस्ट गार्डकी क्याप्टेन नोएमी कायब्याबले स्थानीय रेडियोलाई दिएको जानकारीअनुसार ८७ जना अझै बेपत्ता छन् ।
कोस्ट गार्डका एक प्रवक्ताका अनुसार डुंगामा कुल १३४ जना सवार थिए । त्यसमध्ये ११७ जना यात्रु र १७ जना चालक दलका सदस्य थिए ।दुर्घटनापछि उद्धार गरिएका व्यक्ति तथा फेला परेका मृतकको विवरणका आधारमा ८७ जना अझै सम्पर्कविहीन रहेको जनाइएको छ । उनीहरूको खोजीका लागि उद्धार टोली परिचालन गरिएको छ ।
यसैबीच, भारतको गुजरात राज्यको गान्धीनगरस्थित कुडासन क्षेत्रमा निर्माणाधीन भवनमा फलामको ठूलो स्ल्याब खस्दा केही मजदुर भग्नावशेषमा पुरिएका छन् । दुर्घटनापछि तत्काल राहत तथा उद्धार अभियान सञ्चालन गरिएको थियो । हालसम्म १५ जना मजदुरलाई सुरक्षित रूपमा बाहिर निकालिएको गुजरातका उपमुख्यमन्त्री हर्ष संघवीले बताएका छन् । समाचार एजेन्सी पीटीआईका अनुसार दुर्घटना बुधबार राति करिब ९ बजे भएको हो ।
दुईवटा भवनबीच फलामको संरचना निर्माण गर्ने क्रममा अचानक ठूलो स्ल्याब भत्किएर खसेपछि त्यहाँ काम गरिरहेका मजदुर त्यसको चपेटामा परेका थिए । उद्धार टोलीले भग्नावशेषमा पुरिएका अन्य व्यक्तिको खोजी तथा उद्धार कार्यलाई निरन्तरता दिएको छ ।
