उपचार हुन नसक्दा जाजरकोटमा सुत्केरीको मृत्यु

२० साउन २०७७ जाजरकोट । सालनाल निकालेलगत्तै बेहोस भएपछि कुशे गाउँपालिका–५ बाटुलेकी २७ वर्षीया पशुपति पुनको मृत्यु भएको छ । सोमबार बिहान छोरा जन्माएकी उनको सालनाल खस्न ढिलो हुँदा ज्यान गएको हो ।

बिहान ४ बजे सुत्केरी भएकी उनको ढिलो गरी स्थानीय मेडिकलमा ल्याएर सालनाल निकालिएको थियो ।पुनले यसअघि दुई छोरीलाई जन्म दिएको प्रहरीले बताएको छ ।

शारीरिक अवस्था कमजोर र शरीरमा रगतको कमी भएका कारण उनको मृत्यु भएको बताइएको छ । नवजात शिशुको अवस्था भने सामान्य रहेको जिल्ला प्रहरी प्रमुख प्रहरी नायब उपरीक्षक किशोरकुमार श्रेष्ठले बताए ।